【遊日實用日文】去日本買嘢講「Apple Pay」店員聽唔明？5大常見付款方式日文教學
- 2天前
- 讀畢需時 3 分鐘
已更新：2天前
喺日本買嘢畀錢嘅時候，大家有冇試過遇到呢個狀況：
店員： お支払方法はどうされますか？ (請問想點樣畀錢？)
我： Apple Payで
店員： え。。。？ (黑人問號)
呢個情況真係見唔少！除咗可能因為冇用到日式發音之外 (笑)，其實 "Apple Pay" 呢個字喺日本係唔太常用嘅。
因為 Apple Pay 喺日本只係一個「電子銀包」，店員部收銀機係冇「Apple Pay」呢個掣嘅，佢哋需要知道你究竟係用信用卡拍卡、Suica 定係其他電子支付，先可以㩒掣收錢！
不過喺揀點樣畀錢之前，首先要叫店員埋單！
💡 同場加映：叫「埋單」嘅標準講法與「大叔味」神秘手勢
喺餐廳食完飯想結帳，最標準、最有禮貌嘅講法係：
🗣️ 「お会計、お願いします」(O-kai-kei, o-ne-gai-shi-ma-su)
可能有同學留意到，有啲日本人（特別喺居酒屋）叫埋單時，會對住遠處嘅店員用兩隻食指交叉做一個「X」字手勢。
其實呢個係日本獨有嘅手勢，代表漢字「〆（締める / Shi-me-ru）」，即係「作結 / 完結」嘅意思，外國人見到分分鐘會一頭霧水！
不過如果想試吓用呢個手勢，有幾點要注意啦！
自帶「大叔味」： 根據日本網民嘅講法，呢個動作其實帶有少少「キザなおじさん感」（扮哂野嘅大叔味）！通常係年紀大少少嘅常客先會習慣用，近年都有啲日本年輕人會盡量避免做。
其實幾實用： 雖然有大叔味，但如果坐喺距離店員好遠嘅枱，唔想大叫阻住人，用呢個手勢默默示意店員拎張單過嚟，其實都算係一個唔錯嘅無聲溝通方法。
唔係間間餐廳通用： 呢個手勢唔係所有飲食店嘅「常識」。萬一遇到年輕店員或者喺非居酒屋嘅餐廳，對方真係 get 唔到嘅話，千祈唔好忟憎或者發脾氣呀！
總括嚟講，對遊客嚟講，舉手講句「お会計お願いします」始終係最自然、最得體，又一定唔會表錯情嘅做法！
叫完埋單，就可以準備畀錢啦！以下同大家介紹下日本 5 大常用付款方法嘅日文講法：
以下同大家介紹下日本 5 大常用付款方法嘅日文講法啦！
💡 小貼士：
以下所有日文例子，「○○○○で (de)」後面都可以加句「お願いします (o-ne-gai-shi-ma-su)」，聽落會更加有禮貌！
1. 現金 (げんきん)
呢個唔使多講，去日本記得點都要有現金傍身。
雖然電子支付普及咗，但仲有唔少小店或拉麵店食券機係只收現金。如果食完先發現冇現金就尷尬啦！
🗣️ 實際講法：「現金で (Gen-kin de)」
2. 信用卡 (クレジットカード)
無論你係畀實體卡，定係用 Apple Pay 入面嘅 Visa/Mastercard 拍卡，對店員來講一律都係「信用卡支付」。
🗣️ 實際講法：「カードで (Kaa-do de)」 或 「クレジットで (Ku-re-jit-to de)」
如果想講明係「拍卡」而唔係插卡，可以加多句：「タッチで (Tat-chi de)」
3. 銀聯卡 (銀聯カード)
日本有啲收銀系統會將銀聯卡同普通信用卡分開。付款時記得留意下店內有冇貼住銀聯標誌。
好多時店員會慣手勢當咗銀聯係普通信用卡，結果碌唔過就 say NO。
如果有信心，可以禮貌地提醒店員選擇銀聯選項！
🗣️ 實際講法：「銀聯（ぎんれん）カードで (Gin-ren kaa-do de)」
4. 交通系 IC 卡 (IC カード)
用法同香港八達通一樣，最常見嘅有 Suica (すいか)、PASMO 等等。
🗣️ 實際講法：「ICカードで (Ai-shii kaa-do de)」 或 「交通系で (Kou-tsuu-kei de)」
直接講卡名都冇問題：「Suicaで」 或 「PASMOで」！
5. PayPay (ペイペイ - Pei-pei)
自從香港可以直接用八達通 App 綁定 PayPay 之後，去日本買嘢真係方便咗好多，連唔少街市小店都收！
🗣️ 實際講法：「PayPayで (Pei-pei de)」
日本常用嘅支付方式仲有好多，例如「iD」、「QUICPay」、「d払い」等等就不一一細說。
祝大家旅行爆買愉快！🛍️
📄 延伸閱讀材料：
呢度有條 Link 係日本政府製作嘅「不同支付方式介紹」PDF，內容簡單易明，仲有ふりがな (平假名) 標記，非常適合初學日文嘅同學睇吓當練習：
留言