【做運動都有公眾假期？！】 日本嘅「體育日」到底係慶祝啲咩？

每年 10 月第二個星期一係日本嘅法定假期「スポーツの日（體育之日）」。

究竟點解日本會有個假期專門叫人去做運動？背後原來同奧運有極大淵源！

🏅 【體育日嘅由來：為咗紀念 1964 東京奧運】

為咗紀念 1964 年（昭和39年）10 月 10 日東京奧運開幕，日本政府喺 1966 年正式將 10 月 10 日定為公眾假期「体育の日」。

後來因應《祝日法》修改，日本實施咗「ハッピーマンデー制度（Happy Monday 制度）」, 將部分固定公眾假期移去特定嘅星期一，製造 3 連休。

所以由 2000 年（平成12年）開始，呢個假期就正式改為「每年 10 月嘅第二個星期一」。

🔤 【點解由漢字「体育」改為片假名「スポーツ」？】

去到 2020 年，配合東京再次主辦奧運，法律正式將「体育の日」改名為「スポーツの日」。

點解要特登改用外來語？

「体育」：傳統印象多數係學校學科、身體鍛鍊，帶有一種「被指導、被教育、強制性」嘅嚴肅感覺；

「スポーツ（Sports）」：改用國際通用嘅詞彙，更強調「自發性、享受玩樂同身心健康」。

改名正正係想大家唔好當佢係「嚴格操練」，而係一種自主享受生活嘅方式！

法例中更將假期嘅宗旨明確定為：

「スポーツを楽しみ、他者を尊重する精神を培うとともに、健康で活力ある社会の実現を願う」

（享受運動，培養尊重他人嘅精神，同時期盼實現健康而充滿活力嘅社會）

🏟️ 【呢一日日本人會做咩？】

既然係「スポーツの日」，全日本各地由公營體育館、游泳池到運動場，好多都會喺呢一日免費開放比市民入場使用！同時亦會有好多武道體驗同市民運動節。

📝 今日實用日文筆記：

・スポーツの日（すぽーつのひ / supōtsu no hi）— 體育之日

・祝日（しゅくじつ / shukujitsu）— 法定公眾假期

・連休（れんきゅう / renkyū）— 連假

・スポーツの秋（すぽーつのあき / supōtsu no aki）— 運動之秋

・無料開放（むりょうかいほう / muryō kaihō）— 免費開放

💬 如果香港都有一個「運動日」公眾假期，你當日會真係去做運動，定係留喺屋企瞓覺放鬆？留言話我知～👇